هل يجب علينا أحيانا تخلي أو تنازل عن دينا وعاداتنا

[dal3 world]

بسم الله الرحمن الرحيم


السلام عليكم ورحمة الله وبركاته


كيف الحال .. ؟!


يتكم اليوم أستشيركم .. ؟

::

::



هل يجب علينا أحيانا أن نتخلى أو نتنازل عن دينا وعاداتنا من أجل تعايش مع ظرووف .. ؟!


::

::



امم في البدايه بخبركم القصتين انا ادرس الحينه ماث في كلية امتحان تحدي على قولتهم 8 كتب في 3 اسابيع عشان ادخل باشلر .. !

المهم المدرس اللي يدرسنا هو نفسه في كل القصتين ومن كم يوم قاعد يحكي لنا قصه عن بنت

في بداية الفصل الدراسي الأول في السنة الدراسية الماضية، تعرضت فتاة لضيق في التنفس (أزمة) وطاحت على الأرض وكانت على وشك انها تموت بس الله قدر لها تعيش، لكن الاستاذ ما قدر يمسك طالبة ويساعدها مع انه يقدر يساعدها بسهولة بس لأنه ممنوع انه يلمس اي بنت حتى لو كانت بتموت << قانون من الكلية على كل استاذ

الحمدلله البنت عاشت بس كانت على وشك الموت .. فتخيلوا معايه لو ماتت منو اسبب فموتها اللي حاط هذا القانون ولا استاذنا نفسه اللي يخاف انه يتعرض للطرد لو لمسها .. ؟

هل الاسلام يحرم هذا اشي وليش فرضوا هذا القانون حماية على عادتنا وتقاليدنا وديانتنا .. ؟!

ومثل هذا اشي يعني دكاتره يوم نتكشف جدامهم ويلامسونا .. ! ولا يفرق الاستاذ عن دكتور .. !


أما عن القصة الثانية:

هذي الفتره في كلية مختطلة بنات وشباب وهو قاعد يقولنا انه نتغشا اذا ما نبا نعرس اونه << ينكت عااد بس ضحكنا عشان 10% اللي في ايدينه

المهم

تم يسال بنت معرسه كيف تزوجت،، وقالت له انه ولد عمها وفي عايلتهم ممنوع ياخذون برا عايلتهم وهي ما قد شافته الا ليلة العرس << اصلا نحن بعد كنا مستغربين وين عايشين هذيلا والمشكله ولد عمها يعني


وتم يضحك على عاداتنا قال افرضي انه كان مب مناسب لج شو بتسويين قالت وحده تمزح بتطلق وخلاص انتهت السالفة ويتم يضحك علينا حسسنا انا متخلفيين .. !

الحين عاداتنا اللي ما ادري من متى متوارث هذا اشي الحين صارت متخلفه طبعا في حالة البنت اللي قلت قصها هيه

بس يعني عن طريق الاهل زواج صارت طريقة متخلفة مع انه ابوي وامي لين الحينه عايشين مع بعض مع انه في مشاكل واايد وكثيرة بس الحمدلله ما انفصلوا من اكثر 36 سنه والله يديمها عليهم .. !

بعكس ولد عمي اللي شاف بنت عمي وعيبته وكان يحبها ومعروف هذا اشي وما كملوا سنتين ويبون يطلقون .. ؟!

[الغاليه]

أمممم . بالنسبه لي انا ..


مقبول و ممكن اني استآهل في العآدآت ( بعض العآدآت ) ، لكن صعب جدآ استآهل في الدين ..


يعني ، بحكم التطور اللي صآير <--- طبعآآ شي هب دآخل مخي انه الانسآن يتغير عشآن التطور ، بس صارت و استوت !!



بعطيج مثآل ..

امممم ، قبل فتره كانت عندي عمليه ..
و طبعآآآآ المفروض ، دكتور(ه) اهي اللي تكشف علي و تعالجني . لكن حصل و صار انه ماكانت في دكتور(ه) ..
كان في دكتور .. و طبعآآآآ بعد مناقشه و سين و جيم ، و بعد محاولات لآيجآد دكتور(ه) ..
كان الوضع و الواقع ، انه عمليتي كانت مستعجله ، و لازم دكتور اهو اللي يعالجي ..

فهالحاله ، انا اتقبل هالشي .، لانه شي ضروري ..
لكن لو عميلتي هب مستعجله ، كنت بددددددور لما احصل دكتور(ه) جرآحيه حرمه :)






ثآني شغله ..

البس بشكل عآم ..
احنا كلش هب من عاداتنا البنيه تلبس بنآطيل و هالسوآلف ..
يعني ، اممم ما تعودنا من صغرنا ع هالسوالف <--- يآ حي المخور و الجلابيآآت ..

آلمهم . يقولج مره على مره على مره ..
صار شي عادي اننا نلبس بناطيل <--- طبعا هب في اي مكان و لا بعبايه مفتوحه ..
لكن ، احيانآ ، للحين اسمع العيايز ، او الوالده او الحريم يقولون .. البنت الفلانيه تلبس الشي الفلاني ، وين زمان اول ما شي الا جلابيات و كنآدير .... الخ الخ من سوالف الحريم اللي ما تخلص ..





يعني بالعربي ..

في عادات ممكن نتنازل عنهآآ .،
مثلا لو اروح ادرس برع .. <---- طبعآ اموت و لا يخلوني .. لكن انا في خاطري ، بس مع احد من اخواني :)

لكن في عادات ما نروم نتنازل عنهآ .. مثل البنت تطلع و تروح السينمات ، و المطاعم مع ربيعاتها في حال عدم وجود اي مرآفق لها ( آقصد البودي جآرد ) .. هههههههههههههههههههههه ..

[dal3 world]

مشكوره اختي الغالية

بس اللي اعرفه صح انا مب مفتيه ولا واايد متدينه يعني بشكل فضيع

لأني احيانا اتهاون باشياء طبعا مب كل شي بس مثلا يعني اسمع اغاني وساعات اعق الغشوة خخخ بس الحمدلله متحجبه

المهم

اللي اعرفه انه دين ميسر لنا اموور ويخلينا نتهاون بشياء في حالات الضروريه

مثلا اكل لحم الميته اذا ما كان شي اكل ،، وبعد الوضوء اذا ما كان في ماي او كان الماي بارد نقدر نتيمم

فتخيلي انه هذي البنت محد قدر يساعدها وكان الاستاذ يقدر يساعدها لو ما الله كتب لها عمر يديد ولا كانت بتروح بسبب قانون سخييف العائلات تقدر تتهاون فيه بحالات الضرورية

هذا رايي انا

[زمــــاني]

والله اللي انا أشوووفه انه الضرورات تبيح المحظورات
يعني لو بشوف حد اتفرفر فيه الروح وحليله وأقدر أنقذه بساعده والله ولا عليه من حد

[مسعود]

بعض الاحيان ووقت الحاجة فقط أختي الكريمه

بعض الاحيان تجبر في دول معينه على امور

الله المستعان

وشكرا أختي على الموضوع الابداع من قلمج المبدع